مش للمووووووووووت

الموضوع ده اهداء لكل مريض .. لكل مظلوم .. لكل واحد فقد صديق أو شخص عزيز .. لكل مكتئب وحيران ..

كلنا عارفين قصة لعازر الموجودة في (انجيل يوحنا 11: 1- 44) اللي هي أهم معجزة عملها يسوع .. معجزة سلطانه على الموت، ودايما لما بنسمع القصة دية بنفتكر أهم آيتين واللي كل الخدام بيوعظوا عنهم وهما ..
يو11: 32 لما مريم قالت ليسوع "يا سيد لو كنت ههنا لم يمت أخي!"
والآية التانية في يو11: 40 لما يسوع قال "ان آمنت ترين مجد الله"

لكن المرة دي وانا باقرا القصة ربنا كلمنى في حاجة تانية خالص ورجعت مع الاصحاح للاعداد الاولي والآية رقم 4 لما يسوع سمع ان لعازر مريض قال الكلمات دي:
يو11: 4 "هذا المرض ليس للموت بل لأجل مجد الله ليتمجد ابن الله به"
ولأول مرة اقف عند الكلمات دي .. هذا المرض ليس للموت .. يسوع كان عارف ان لعازر عيان لكن مش للموت .. مش للنتيجة الطبيعية ولاقيت صوت بيقولي ويقول لكل واحد فينا لكل واحد عيان .. تعبان .. حزين .. يائس.. حيران
المرض ده مش للموت
الاحباط ده مش للفشل
الفشل ده مش لليأس
الحزن ده مش للاكتئاب
الظروف المادية الصعبة دية مش للفقر
اعادتك السنة مش للفشل في حياتك العملية
خسارتك لشغلك مش للاحباط
ارتباطك وعلاقتك اللي فشلت مش نهاية العالم ولا لتدميرك
انتظارك وقت طويل لوعود الله مش لخيبة الأمل
حلمك بحاجة سنين ومتحصلش مش للانهيار
فقدانك أعز الناس مش للوحدة
خيانة صديقك ليك مش لانعدام الثقة بالناس
رأي الناس السيئ فيك مش لتقليل قيمتك
أحساسك بالظلم مش للانتحار

لو كان المرض مش للموت اللي هو أصعب شئ ومحدش يقدر عليه غير خالق الكون .. يسوع بنفسه قال عليه انه مش للموت ....... "بل لأجل مجد الله ليتمجد ابن الله به"تفتكروا الحاجات الكتيرة اللي قولناها دي واللي ابسط من الموت خسارة انها تكوت لمجد الله ؟؟؟

أكيد كل واحد فينا هيلاقي نفسه في موقف من المواقف اللي فاتت دي .. أسأل نفسك: خسارة ان الحاجة دي تكون لمجد الله .. خسارة أو صعب عليك تتعب شوية عشان يظهر مجد الله ؟؟ لكن قبل ما تجاوب لازم تصدق أنها لمجد الله فعلاً مش صدفة .. ولا اضطهاد .. ولا ربنا مش بيحبك .. ولا عقاب على خطية .. ولا تقول اشمعنا انا يحصلي ده .. افهم كويس أنك لو آمنت لتشوف مجد الله .. ويسوع مش هيهون عليه دموعك ولا تعبك لكن زي ما حزن وبكي على لعازر هيبكي عليك وهيرحمك وهيعوضك على تعبك .. لكن لازم تفهم الدرس .. تفهم ربنا عاوز يقولك اية.. تفهم ليه استخدمك أنت بالذات عشان تمجد اسمه ..خلينا نقول زي ما مرثا قالت " يا سيد لو كنت ههنا لم يمت أخي (مشاعر غضب وحزن بشرية لكن كملت وقالت) لكن الآن أيضا أعلم أن كل ما تطلب من الله يعطيك الله أياه"
خليك واثق ان ربنا هيديك لمجد اسمه بيك وفيك .......... آمييييييين

__________________

" أما رحمتي فلا أنزعها عنه ...
لا أنقض عهدي ولا أغير ما خرج من شفتيّ "
(مز89: 33، 34).

الــــــــلـــــــــــــــه
ياكيمو موضوع جميل
الرب يعوض تعب خدمتك ومحبتك كيمو

مرسيي اوى ربنا يباركك ويخليكى ويارب تكونى بخير

مش للمووووووووووت Maryforpsdkt9

بجد يا كريم موضوع جميل جدا

ربنا يعوضك

مرسيي اوووووووووووى ماجى وسلامتك اوووووووووووى

جميلة ياكيمو الرب يبارك حياتك